Бұл мақалада функционалды–семантикалық өрістің екі негізгі қыры — ұғымдық (мазмұндық) және тілдік (құрылымдық) аспектілері жан-жақты талданады. Өріс теориясы тілдің әр деңгейіндегі бірліктердің ортақ семантика негізінде бірлесіп, күрделі мағыналық жүйе түзуін түсіндіреді. Автор функционалды–семантикалық өрістердің негізінде жалпы адамзатқа ортақ ұғымдық категориялар жатқанын, алайда олардың тілдік көрінісі әр тілдің ішкі жүйесіне сәйкес әртүрлі болатынын көрсетеді. Сонымен қатар грамматикалық категориялар, синтаксистік құрылымдар және лексика-грамматикалық бірліктердің өзара әрекеттесуі өрістің қалыптасуында маңызды рөл атқаратыны дәлелденеді. Зерттеу ФСӨ-нің тілдік және ұғымдық деңгейлерінің өзара байланысын анықтап, өріс құбылысының теориялық мәнін айқындайды.